足球場 | 全國運動場館資訊

標準足球場—標準足球場尺寸：唔係個個足球場嘅尺寸都完全一樣嘅，不過大部份足球場嘅尺寸都係105米乘68米或者115碼乘74碼。足球場係進行足球 ...

足球場係進行足球比賽嘅場地。足球場嘅基本條件係一塊長方形嘅平地，可以係草地、人造草、膠地甚至石屎地，較簡陋嘅足球場可能淨係有兩邊龍門同幾條白線，設備較好嘅足球場可能附設有燈光、看台、更衣室等設施。畀職業足球聯賽或國家隊進行比賽嘅足球場，可以喺四面設有廣告板。有啲足球場外圍可能設有田徑跑道。

足球場嘅標準由國際足協制訂。喺青少年、元老、殘障人仕、草根足球賽事（低組別賽事），可以根據佢哋嘅意願選擇性修改：比賽場地嘅嘅大細、兩條龍門柱之間闊度同由地面至龍門橫楣底嘅高度。

草皮只可以用全天然草地或全仿真草地，唔可以天然草同仿真草混合使用，仿真草場地嘅顏色一定要係綠色。唔同地區嘅足球場嘅草皮有所唔同，但係都有一個共同點，就係只能夠由國際足協認可嘅供應商供應同種植/安裝草皮[1]。另外，國際足協成員國可以喺國際足協許可範圍內制訂自己嘅草皮標準，例如：中國足協規定中超聯賽場地一定要係天然草皮[2]，而加拿大就更多球場用人造草皮[1]。

比賽場地一定要係長方形同劃上連續嘅界線，界線唔可以構成危險；喺唔構成危險嘅情況之下，可以喺天然草地度用仿真草做場地界線。界線係屬於比賽場地嘅一部份。比賽場地界線一定要符合球例列明嘅標準先至可以進行比賽。

仿真草足球場可以有其他界線（例如欖球場界線），但係呢啲界線嘅顏色要同足球場地界線要明顯唔同，同埋可以清晰噉分辨。